CAGAYAN DE ORO CITY – Patay ang duha ka brgy tanod human nalambigit sa aksidente diha sa Zone 4, Brgy Bugo ning syudad.
Giila ang mga namatay nga sila si Saturnino Taburnal, 60-anyos ug Benjamin Lumani, 62-anyos pulos tanod sa Brgy Casinglot, Tagoloan,Misamis Oriental.
Gibutyag ni Puerto Police Station investigator Police Senior Staff Sgt Ryan Sevellino nga kalit mi-liko ang motorsiklo nga gimaneho ni Tabornal ug mibangga kini sa Hi-lux nga gimaneho ni Cerilo Saluaga , 46-anyos, minyo ug residente sa Sta Ana, Tagoloan ning lalawigan.
Tungod sa kusog nga impact sa panagbangga, nakaangkon sa daghang samad sa kalawasan ang mga biktima nga maoy hinungdan sa ilang kamatayon.
Samtang gibarugan sa drayber sa Hi-lux pick up truck nga si Saluaga nga ang motorsiklo nga gisakyan sa mga biktima maoy mibangga sa iyang sakyanan.
Gibutyag sa 46-anyos nga drayber nga gikan sila Cagayan de Oro ug padulong na mopauli dihang kalit gibanggaan ang iyang sakyanan sa mga biktima.
Gani, adunay mga testigo nga nagbutyag nga posibleng nakainom si Saturnino Taburnal tungod kay nagliko-liko ang dagan niini.
Kasuhan sa kapolisan sa reckless imprudence resulting to multiple homicide ang drayber sa sakyanan.
