CAGAYAN DE ORO CITY, Philippines – Tingkagol na sa prisohan ang lima ka suspek nga nasapon sa Philippine Drug Enforcement Agency – Region 10 nga naghit-hit sulod sa gisumbong nga drug den sa Barangay 11, Impalambong, Malaybalay City, Bukidnon.
Segun sa report, hiniusang gironda sa PDEA, Bukidnon Provincial Office, Malaybalay City Police Station, Regional Intelligence Unit (RIU) ug Bukidnon Provincial Intelligence Team (PIT) ang natumbok nga ‘suyupanan’ ug nasikop ang tag-iya sa drug den nga sila Ai-Ai, 20 anyos, ug Alias Je, 25.
Arestado usab ang tolo ka mga pahenante nga na-aktoha’ng nagpot-session dihang gilusad ang operasyon.
Kini gilangkoban sa 16 anyos nga menor-de-edad nga taga Kalasungay; alyas Dex, 32 anyos nga tag Zone-3, Brgy.10; ug alyas Char, 22, nga taga Barangay Casisang.
Nakompiskar sa mga otoridad ang mubalor sa P81,600 street value sa gitooha’ng drugang shabu.
Sa adlaw’ng Lunes, dad-on sa piskalya ang mga suspect aron pasakahan sa kasong paglapas sa Republic Act 9165 o mas naila isip Comprehensive Dangerous Drugs Act of 2002.
