Nasikop sa kapulisan ang usa ka High Valued Individual (HVI) sa joint anti-drug operation, alas 5:37 sa buntag, Pebrero 17, sa Purok 13, Barangay Palao, Iligan City.
Ang mga operatiba sa City Drug Enforcement Unit sa Iligan City Police Office (CDEU-ICPO), uban sa Philippine Drug Enforcement Agency Regional Office 10 (PDEA 10) ug mga intel operatives sa ICPS5, milusad sa buy-bust operation nga miresulta sa pagdakop sa alias “Mata,” 43 anyos, single, ug residente sa maong barangay.
Nakuha sa posisyon sa suspek ang walo ka heat-sealed transparent plastic sachets nga adunay puti nga crystalline substance nga gituohang shabu.
Mitimbang kini sa 100 gramos kundiin ang Standard Drug Price (SDP) nga 680,000.00.
Ang drugas gisulod sa itom nga pouch, sa itom nga belt bag.
Nakumpiskar usab sa suspek ang iyang cellphone nga gigamit sa transaksyon, timbangan ug tulo ka papel nga tag 100 pesos – marked money.
Subay sa inisyal nga imbestigasyon, kini pa ang unang higayon nga nadakpan ang suspek sa pagpayuhot sa ilegal nga druga.
Unang mi-angkon ang suspek nga nakuha niya ang iyang supply sa droga sa Marawi City ug gipang-apod-apod kini sa Iligan.
Ang nadakpan nga suspek gi kustodiya sa Police Station 5, Iligan City Police Office, alang sa hustong disposisyon.
Pasakaan siya sa kasong paglapas sa Sec. 5 ug 11, Article II sa Republic Act 9165, o mas naila isip Comprehensive Dangerous Drugs Act of 2002.
Si PBGEN CHRISTOPHER N ABRAHANO, Regional Director sa PRO10, mipasidungog sa mga operatiba sa malampusong operasyon.
“Padayon kitang magpursige sa kampanya batok sa ilegal nga droga. Magpadayon kita sa pagpangita sa mga high-value individuals nga naghulga sa atong komunidad. Among gi-awhag ang publiko nga suportahan ang among paningkamot pinaagi sa tukma ug husto nga impormasyon,” iyang giingon.
