CAGAYAN DE ORO CITY – Kasuha’g murder sa kapolisan ang suspected drug addict nga lalaki kinsa miunay pagpatay sa kaugalingong kaipon niini nga 3rd year college student sa Purok 9,Pablacion Sur,Don Carlos,Bukidnon.
Giila ni Don Carlos Police Station commander Police Maj. Patrick Castro ang suspek nga si Elson Jamisula,27 anyos kinsa miagi na’g drug rehabilitation samtang ang biktima mao si Kemberly Achas,22 anyos nga pulos nagpuyo sa lugar.
Miingon si Castro nga gusto sa biktima nga ipasuso ang ilang siyam bulan nga anak apan gikasuko kini sa suspek.
Dugang sa opisyal nga nanirado sa pultahan ang suspek hinungdang walay naka-aparta sa iyang pagbun-og sa biktima ug pagdunggab gamit ang mga binuak nga bildo gikan sa ilang ‘glass table’.
Sa pagpangutana sa kapolisan ug local media ngadto sa suspek,giingong nahinaykan niya ang biktima kay ‘halas’ na ang iyang panan-aw niini nga daw mosukol ngadto kaniya.
Nag-viral ang video diin makita kon giunsa pagpatay sa suspek ang iyang kaipon.Nasuta nga kanhi ‘rehab patient’ ang suspek tungod sa giingong paggamit sa ilegal nga droga.
Hisayrang gawas nga gibunal-bunala’g bangko sa suspek ang biktima,naputol usab ang ‘ubol-ubol’ niini sa li-og kay gigamita’g binuak nga bildo sa iyang paghimo sa kremin sa miaging Sabada sa hapon sa Marso 11 ning tuiga.
