CAGAYAN DE ORO CITY-Gipanganti ni city administrator Dionne Gersana ang pagpatuman sa random mandatory drug test batok sa tanang mga empleyado sa city hall sulod ning bulana.
Gihimo ni Gersana ang pahayag tungod sa pagkasikop sa laing empleyado sa city hall nga si Westconsin Abejo Brazil,29 anyos,ulitawo diha sa Barra,Brgy Macabalan sa syudad sa miaging semana.
Miingon si Gersana nga may mga opisina na nga nakahan-ay aron sugdan ang pagpaubos sa mga empleyado sa drug test.
Sa miaging Setyembre ning tuiga,nasikop usab ang kanhi empleyado sa city hall nga tuyo unta mobalik pagtrabaho dihang akto nasapon nagsuyop sa gitoohang shabu sulod sa motel ning syudad.
Samtang kasuhan sa pagbaligya ug paghupot sa gidiling droga ang empleyado sa city hall nga nasikop sa kapolisan atol sa buy bust operation diha sa Barra,Brgy Macabalan sa syudad.
Gibutyag ni C/Insp Harvey Abellanosa,commander sa Cogon Police Station nga gawas sa suspek nga si Brazil,may laing mga empleyado pa sa gobierno ang gi-monitor nila nga naggamit ug nagbaligya usab sa gidiling droga.
Una niini,nakuhaa’g pipila ka sachets sa gitoohang shabu si Brazil atol sa operasyon sa kapolisan sa mismong brgy nga kini nanimuyo sa miaging kadlawon sa Sabado.
