CAGAYAN DE ORO CITY – Detinado ang suspected drug user nga mitigbas sa daghang higayon sa kaugalingong kaipon niining babaye sulod sa ilang balay sa Purok Miracle,Kipaducan,Pangantucan,Bukidnon.
Giila sa Pangantucan Police Station ang suspek nga si Allan Sudaria,hingkod ang edad samtang ang kaipon niini mao si Lea Fernandez nga pulos nagpuyo sa lugar.
Sa inisyal nga imbestigasyon,nag-selos ang suspek nga nag-resulta sa panaglalis ug misampot sa pagpanigbas ngadto sa biktima hangtod nga nakutluan kini’g kinabuhi.
Mismo ang inahan sa suspek ang nakadiskobre sa nagbuy-od nga lawas sa biktima dihang miduaw kini sa ilang balay.
Nagbato sa mga samad sa ulo,liog ug nangaputol usab ang dalunggan ug mga kamot sa biktima hinungdan sa kamatayon niini.
Mismo na ang ilang brgy officials ang mitugyan sa suspek sa kapolisan dihang boluntaryo nagtahan human sa kremin.
Giangkon sa suspek nga nakagamit kini’g ilegal nga droga sa miaging semana ayha natigayon ang ngilngig nga kremin.
