Gipahinumduman ni Carden Amitao sa DSWD-City Link ang mga benepisyaryo sa Pantawid Pamilyang Pilipino Program o 4Ps nga ang maong government cash grant kinahanglan gamiton alang sa mga panginahanglanon sa pamilya, ilabina sa pagkaon ug edukasyon.
Gipasabot ni Amitao nga dili angay nga ipalit ang ayuda sa ilimnong makahubog o gamiton sa mga sugal sama sa scatter tungod kay dili kini makahatag og kaayohan sa panimalay.
Iyang gipasabot nga ang sayop nga paggamit sa maong kwarta mahimong mosangpot sa pag-usik sa limitadong salapi nga unta makatabang sa adlaw-adlaw nga panginahanglan sa pamilya.
Busa, iyang giawhag ang mga 4Ps household members nga gamiton ang suporta sa mga prayoridad nga panginahanglan ug maghimo og maayong plano sa panalapi aron mas mapuslan ang tabang nga gihatag sa gobyerno.
