CAGAYAN DE ORO CITY – Gikalipay sa Department of Social Welfare and Development o DSWD-Northern Mindanao ang hukom ni Pres Rodrigo Duterte nga isalig na lamang sa ilang ahensiya ang pagpang-apod apod sa relief goods ug cash assistance sa mga apektado sa Covid crisis sa tibook nasud.
Gibutyag ni Pantawid Pamilya Information Officer Oliver Inodeo nga kini na ang ikalima nga higayon nga giusab sa ahensiya ang ilang mga gabayan sa pagpanghatag hinabang sa mga residente.
Pabilin pang giplastar karon sa ahensiya ang Social amelioration fund alang sa mga apektado sa covid crisis.
Samtang gipaimbestigaran nila ang nagpakatag fake news kalabot na sa programa sa ilang ahensiya.
Kini human gitawag ni Pantawid Pamilya Information Officer Oliver Inodeo nga dakong bakak ang gipakatag sa social media sa usa ka Marieta Lucagbo nga taga-Xavier Heights Subdivsion, Balulang, Cagayan de Oro City nga nanghatag na ang DSWD Field Office 10 sa financial assistance.
Si Inodeo miingon nga tuyo lamang ni Lucagbo nga libogon ang katawhan ilabina kadtong naghulat sa hinabang sa nasudnong gobyerno.
Siya miingon nga dakong krimen ang pagsabwag sa fake news ubos sa Section 6 sa Republic Act 10175 o ang gitawag nga Anti-Cybercrime Law.
Si Lucagbo ang gidasig usab nga mohatag sa iyang panig sa mga mikropono sa Bombo Radyo.
