
Gipasigarbo sa Department of Trade and Industry (DTI) ang mga kalampusan sa pagpanguna niini sa ASEAN Economic Community Council atol sa 2026 ASEAN Summits, lakip na ang pagpirma sa ASEAN Digital Economy Framework Agreement (DEFA).
Gibutyag ni DTI Secretary Ma. Cristina Roque nga napirmahan na sa mga ministro sa 11 ka miyembrong nasud sa ASEAN ang maong kasabutan niadtong Nobyembre 14, 2026, nga nagtumong sa pagpalig-on sa panaghiusa ug kooperasyon sa digital nga ekonomiya sa rehiyon.
Matud ni Roque, ang DEFA mao ang unang kasabutan sa maong matang nga naglangkob sa tibuok rehiyon sa kalibotan ug usa ka dakong lakang sa pagpalambo sa mas konektado, luwas ug inklusibong digital nga ekonomiya.
Dugang pa niya, makatabang kini sa pagpasayon sa digital trade, transaksiyon sa elektronikong paagi, pagbalhin sa datos tali sa mga nasud, ug pagpalig-on sa proteksiyon sa mga konsumidor batok sa mga hulga sa internet.
Gilauman nga pinaagi sa maong kasabutan, mapalambo ang mas hiniusang digital nga ekonomiya nga makabenepisyo sa hapit 680 milyong katawhan sa ASEAN, samtang gibanabana nga modoble ang kantidad sa digital economy sa rehiyon gikan sa 1 trillion US Dollars ngadto sa 2 trillion US Dollars sa tuig sa 2030. (raniel mahunyag)



