Gibutyag ni DTI Misamis Oriental Provincial Director Jesusa Abear nga aduna silay hugot nga pagmonitor sa presyo sa mga produkto nga gikinahanglan alang sa balik-eskwela sa tibuok lalawigan gikan sa Lugait hangtod sa Magsaysay.
Gipatin-aw sa direktor nga bisan pa man og adunay kalainan ang presyo sa nagkalain-laing retailers, kinahanglan gayud nga magpabilin ang kantidad sa maong mga item sulod sa gitakdang Suggested Retail Price o SRP.
Tungod niini, gipahibalo sa ahensya nga makita sa ilang opisyal nga social media pages ang mga price guide aron adunay basehan ang mga ginikanan ug estudyante sa ilang pagpamalit.
Gawas sa dakbayan, gipatuman usab ang susamang monitoring sa mga munisipyo ug uban pang mga component cities aron maseguro nga dili makapahimulos ang mga negosyante.
Gawas niini, giawhag sa buhatan ang mga konsumante nga kanunayng susihon ang maong mga listahan aron makapili sila og tindahan nga haom sa ilang badyet.
