Dako ang paglaum ni Cagayan de Oro City Councilor ug Chairman sa Committee on Trade and Commerce George Christopher Goking nga makadani og dugang nga mga investment ang dakbayan sulod sa pipila ka bulan pinaagi sa pakig-istorya sa mga negosyante sa 35th Mindanao Business Conference.
Kahinumduman nga nakigpulong na ang Trade and Investment Promotion Center sa dakbayan ngadto sa counselor sa European Union sa Pilipinas nga si Marco Gemmer aron susihon ang posibleng kolaborasyon bahin sa green cycle economy ug solid waste management.
Dugang pa sa maong opisyal, padayon usab ang ilang panag-istorya sa ubang mga nasud sama sa Australia aron makakuha og mas daghang suporta alang sa pribadong sektor.
Gipasiugda usab sa konsehal nga ang paglambo sa negosyo ug sa lokal nga kagamhanan kay magkaabag gayud aron mas makahatag og maayong serbisyo ug pribilehiyo sa mga residenteng Kagay-anon.
