Gihupay sa palasyo ang gibating kabalaka sa publiko, human kapin 20 sa miyembro sa kabinete ni Presidente Bongbong Marcos nga mipasa sa ilang courtesy resignation.
Gikompirmar ni Executive Secretary Lucas Bersamin ang presentasyon sa dugang mga cabinet members nga nahimong tipik sa gipatumang lahugay ni Presidente Marcos, sa wala pa mibiya aron tambungan ang ASEAN Summit sa Malaysia.
Gani, gibutyag ni Bersamin nga tolo ka miyembro sa kabinete ni Marcos ang iyang gi-uban sa summit aron mutabang kaniya sa pagpangitag dugang investment ug job opportunities nga ibubo dinhi sa Pilipinas.
Ang mga sinaligan nga miyembro sa gabinete nga gi-uban ni Marcos, gilangkoban nila Trade and Industry Secretary Cristina Roque, Presidential Communications Office Secretary Jay Ruiz, ug Mindanao Development Authority Secretary Leo Tereso Magno.
Una nang mitin-aw ang palasyo nga ang pagbalasa sa mga kalihim ni Marcos walay sagol pamulitika apan, nagbase kini sa ilang overall performance sa milabay’ng tolo ka tuig.
