CAGAYAN DE ORO CITY – Gipad-an ni Police Regional Office 10 Director Brig Gen Ricardo Layug Jr sa dugang puwersa gikan sa Kampo Alagar ang city police office nga maoy mohatag seguridad sa kapistahan sa dakbayan.
Kini haom usab sa hangyo ni Cagayan de Oro City Police Office o COCPO City Director Col Salvador Radam sa pagsiguro nga luwas ang mga kalihukan nga nakahany-ay sa kapistahan sa syudad.
Miingon si COCPO spokesperson Lt Col Evan Vinas nga dako’g tabang ang maon mga pulis aron masiguro nga malikay sa peligro ang katawhan ug mga bisita nga maki-piyesta sa syudad sa Agosto 28.
Samtang gipaniguro sa Task Force Oro nga walay mga pundok nga makasabwag kagubot aron matugaw ang kasaulugan sa kapistahan kuyog ang daghang kalingawan sa dakbayan.
Namahayag si Army Col. Warren Munda,commander Task Force Oro nga walay kumpiyansa ang ilang tropa bisan kon pabiling negatibo sa mga bahad sa terorismo ang syudad.
Siya miingon nga nagkinahanglan usab sila sa kooperasyon sa katawhan aron makab-ot ang kagustuhan sa dakbayan nga malinawon isaulog ang kapistahan sa patron San Agustin ning tuiga.
