Gipalig-on karon sa Department of Education sa dakbayan sa Cagayan de Oro ang seguridad sa mga pampublikong eskwelahan pinaagi sa pakigtambayayong sa lokal nga kapulisan ug sa mga opisyal sa barangay.
Matud pa ni Romeo Aclo, ang Program Head sa DepEd Cagayan de Oro, gihimo kini nga lakang aron masusi ang mga bag sa mga estudyante ug masiguro nga walay makadala og bisan unsang delikado nga gamit sulod sa klasehanan.
Dako usab ang pagpasalamat sa buhatan tungod sa pagpadala og dugang mga pulis ug barangay tanod sa mga tunghaan nga maoy nagtabang sa pag-inspeksyon aron makatutok ang mga magtutudlo sa ilang pagtudlo.
Gipadumduman usab ni Aclo ang tanan nga importante kaayo ang kooperasyon sa mga ginikanan ug sa tibuok komunidad tungod kay ang barangay ang unang pundasyon sa seguridad sa katilingban.
