Wala pa maaprobahe ang pagdugang og redemption site alang sa P20 rice program sa Misamis Oriental, sumala sa pahayag ni Kharren Retiza, acting branch manager sa NFA Misamis Oriental branch, human sa ilang sesyon uban sa konseho kabahin sa maong hangyo.
Matod ni Retiza, usa sa gisumite nga proposal mao ang pag‑abli sa dugang P20 redemption site sa NFA Patag warehouse, apan kini nagpabiling under review sa pagkakaron.
Dugang pa niya, sukad niaging Miyerkules mikunhod na ang taas nga linya sa mga mamalitay nga kaniadto maghulat pa alas dos sa kaadlawon o bisan sa adlaw pa una sa schedule aron maka‑avail sa barato nga bugas.
Gipasabot usab niya nga nakatabang sa paghinay sa pila ang pag‑aprobah sa dugang personnel gikan sa FTI nga motabang sa manual checking sa authenticity sa IDs sa mga benepisyaryo.
Tungod niini, nagpadayon ang NFA sa pagmonitor sa operasyon ug sa pagtan‑aw sa posibleng pagpalapad sa redemption sites aron mas episyente ang serbisyo sa publiko.
