CAGAYAN DE ORO CITY – Gitakdang itugyan na sa tropa ni PNP-12 regional director Police Brig Gen Jimili Macaraeg ngadto sa Lanao del Sur PNP ang usa pa ka akusado pag-ambush sa convoy ni Provincial Gov. Mamintal ‘Bombit’ Adiong Jr sa lungsod sa Maguing.
Kini human madakpi sa hiniusang operasyon sa PNP ug AFP si Lomala Baratomo alyas Commander Lomala,42 anyos,minyo nga nagpuyo sa Bato-Bato,Maguing samtang nagtagu-tago sa Sitio Morales.Brgy Centrala,Surallah,South Cotabato.
Miingon si Macaraeg nga nadakpan si Lomala pinasikad sa warrant of arrest gikan kang RTC Branch 8 Presiding Judge Samina Sampaco Macabando Usman tungod sa kasong murder.
Giakusar sa PNP nga si Baratomo ang kauban sa napatay nga si alyas Otin nga apil sa mi-ambush sa mga sakyanan diin sakay si Adiong.
Nasuta nga top 5 BARMM most wanted ug numero nga pinangita sa PNP si Baratomo sa Lanao del Sur.
Hisayrang atol sa pagka-ambush kang Adiong,tulo sa iyang mga pulis ug usa ka sibilyan nga driver ang dead on the spot samtang padulong unta sila sa lungsod sa Wa-o niadtong Pebrero 17 ning tuiga.
