CAGAYAN DE ORO CITY-Gipadumduman sa Northern Mindanao Region 1 Fraternal Order of Eagles ang tanang miembro nga dili sipyaton ang pagsuporta sa Dugong Bombo 2017 diha sa 2nd floor sa Limketkai Mall karong adlawa.
Kini human tinguha usab ni NMR-1 Gov Anjun Gomez nga maka-contribute sa daghang ihap sa mga dugo magamit sa katawhang nagkinahanglan niini.
Si Gomez miingon nga kaabag nila sa pagkuha sa Dugong Bombo ang mga personahe gikan sa Dept of Health-10.
Samtang gihangyo ni Global Ram International Supreme Grand Founder retired Staff/Sgt Erol Bermudez ang tanan nilang himsog nga miembro nga magpakuha’g dugo ning adlawa.
Kini tungod kay gusto nila nga subli makuha ang pinakadaghang ihap sa blood successful donors nga partisipante sa Dugong Bombo ning tuiga.
Kini ang hinungdan nga giawhag usab ni Bermudez ang iyang mga ginsakupan nga dili pakyason ang tinuig nga proyekto sa Bombo Radyo.
Sa pikas bahin,kasado na usab ang libuang magtutudlo sa DepEd Schools Division ning syudad pagsuporta sa Dugong Bombo sa Limketkai ning syudad.
Gibutyag ni DepEd City Division General Coordinator Dr Rose Sudaria nga kapin sa 2-mil ka personahe ang ilang dad-on aron suportahan ang kalihukan sa Bombo Radyo ning adlawa.
Gani,may Dugong Guro project sila nga ila usab gi-alayon sa proyekto sa Bombo Radyo aron mausa ang kalihukan ning adlawa.
Gani,moduyog ang Muslim community sa Cagayan de Oro Chapter sa Dugong Bombo 2017.
Gibutyag ni Chapter President Muhamad Gundarandin nga mao na kini ang ikaduhang higayon nga misalmot sila sa tinuig nga bloodletting project sa Bombo Radyo sa syudad.
Giawhag ang ilang mga miembro nga mo-uban kaniya sa pagdonar ug dugo aron mahatag kini sa mga nanginahanglan.
Panaghiusa ang tumong sa ilang pundok sa pagtambong sa Dugong Bombo ning tuiga.Samtang dili magpalupig ang mga drayber sa habal-habal sa Indahag Single Motor Operator and Driver Association sa pagtambong sa Dugong Bombo 2017.
Gibutyag ni Association Presidente Mamerto Balaga nga nalipay kaayo sila kay personal silang gi-imbitar sa Bombo Radyo.
Nagpanikad na usab ang ilang sakop nga makahatag sa dugo ilabina nga mao pa kini ang ilang unang higayon nga musalmot sa usa ka lapad nga civic project.
Sayud usab ang mga sakop sa Indahag Single Motor Operator and Driver Association nga makapabaskog sa ilang lawas ang paghatag sa dugo gawas pa nga makatabang sila sa mga nagkinahanglan sa dugo.
#dugongbombo2017
