Duha ka aktibong pulis ang gitanggong karon human nadakpan sa usa ka checkpoint human sila gitudlo nga responsable sa pagpamusil sa usa ka sibilyan atol sa away sa kalingawan sa Barangay Indahag, Cagayan de Oro City.
Nakaangkon og samad pinusilan sa iyang paa ang 38 ka tuig nga biktima, samtang nakumpiska gikan sa duha ka pulis nga may ranggong Police Executive Master Sergeant ug Patrolman ang duha ka 9mm nga armas human sila gitudlo sa 13 ka tuig nga saksi.
Matud pa ni Cagayan de Oro City Police Office Spokesperson PMaj. Emelita Simon, nagsugod ang gubot sa panaglalis tali sa biktima ug sa usa sa mga pulis hangtod nga nisangpot kini sa physical nga away ug pagpamusil.
Gipasabot sa opisyal nga giandam na karon ang mga papelis aron pormal nga ipasaka ang kasong frustrated murder ug mga kasong administratibo batok sa duha ka suspetsadong pulis.
