Gipahibalo sa Cagayan de Oro City Police Office o COCPO pinaagi sa ilang spokesperson nga si PMAJ Emilita Simon nga kasamtangang naka-hold na sa City Holding and Accounting Section ang duha ka pulis nga giakusahang mibuhat og sexual assault sa duha ka police interns.
Gitin-aw sa opisyal nga nagpabilin pa gihapon nga usa ka reklamo ang maong alegasyon samtang gihatagan og sakto nga lugway ang mga biktima aron makadugang sa ilang mga affidavit ug imbestigasyon.
Gumikan niini, gipangulohan sa Women and Children Protection Desk ug City Investigation Detective Management Unit ang gihimong pakig-istorya sa mga biktima aron makakuha og dugang pormal nga pahayag.
Subay sa maong kalamboan, nagpaabot na usab ang mga awtoridad sa pinal nga desisyon gikan sa ilang regional office alang sa aprubasyon sa gipasakang opisyal nga rekomendasyon batok sa duha ka miyembro sa kapolisan.
