Gipamugos sa Kabataan Partylist nga usa ka direktang krimen batok sa kabus ang matud pa hiwi nga sistema sa hustisya diin giprotektahan ug gi-espesyal ang mga higante sa politika sama nila ni Marcos, Romualdez, ug uban pa.
Sumala sa representante sa grupo nga si Cobbie Jan Canda, usa ka dako nga kabuang nga gipadayon sa gobyerno ang pagpasakit ug pag-priso sa mga ordinaryong mag-uuma samtang ang mga kawatan sa pondo nagpadayon sa pagpahimulos sa gahum.
Gitin-aw ni Canda nga dili na gayud matabonan sa mga linipat nga pa-raffle ug pasundayag sa gobyerno ang kasuko sa katawhan nga gidaog-daog sa balaod.
Tungod niini, nanawagan ang grupo nga paninglan ug ipapanubag ang tanang opisyal nga nagpaluyo sa maong dunot ug pabor-pabor nga pamunoan.
