Mukabat sa ₱210,000 ang gibana-banang kadaot ug duha ka tawo ang naangol sa miulbo nga sunog sa Salcedo Village, Zone 2, Barangay Kauswagan sa dakbayan sa Cagayan de Oro kagahapon sa kadlawon.
Gisaysay ni Kauswagan Fire Station 6 Investigator FO3 Greg Largo nga nadawat nila ang tawag sa alas-2:47 sa kadlawon diin dali kining na-fire out pag-abot sa alas-3:08 sa buntag.
Tungod sa maong insidente, nakasinati og first degree burn sa nawong ug lawas ang usa ka 12-anyos nga babaye samtang na-sprain usab ang wala nga tiil sa amahan niini .
Sa pagkakaron, padayon pa ang imbestigasyon sa hinungdan sa sunog diin giisip nga partial damage ra ang nakuha sa duha ka duha-ka-andana nga balay tungod kay second floor ra ang naugdaw.
