CAGAYAN DE ORO CITY, Philippines – Duha patay tungod sa cardiac arrest dihang gilusob sa kapin 2,000 ka miyembro sa Police Regional Office -11 ang Kingdom of Jesus Christ Compound, sa Buhangin District, Davao City, pasado alas 5 sa kadlawon, kagahapon.
Segun ni Atty. Israelito Torreon nga duna pay laing lima ka miyembro sa KOJC ang gi-atake sa kasing-kasing dihang kalit gidusmo sa kapulisan ang ilang gibantayang ganghaan sa compound.
Giila ni Torreon ang namatay nga si Edwin Escubido Cababat, 51-anyos, usa ka food vendor samtang ang laing usa, naila nga ‘hardcore member’ ug residente sulod sa compound ang nakabsan sa paglanding sa hospital.
Hisayran nga duha ra ka warrant of arrest ang nasilbi sa raiding team, ug miabot sa kapin tolo ka oras ang pagsuhid sa PNP sa 30% nga porsyon sa compound.
Natapos ang adlaw nga duna pay 16 ka miyembro sa simbahan ang samaran ug milanding sa Southern Philippines Medical Center.
Gihimakak ni Police Brigadier General Nicolas Torre III ang report nga sila ang hinungdan kung nganong dunay patay, atol, sa ilang pag-atake sulod sa compound.
Nahuman ang tibook adlaw nga wala makaplagi sa baga nga puwersa sa kapulisan si Appointed Son of God, ug KOJC Church founder, Pastor Apollo Quiboloy.
