Hisayran nga sa 80 ka barangay sa dakbayan sa Cagayan de Oro, duha lamang ang adunay functional material recovery facility (MRF) nga makahimo sa hustong pagbulag sa malata, dili malata ug recyclable nga basura. Kini mao ang Barangay Agusan ug Barangay Pagatpat.
Sumala ni CLENRO Manager Elvisa Mabilen, adunay pending incentive alang sa maong mga barangay tungod kay sila lamang ang nakatuman sa mandato sa Republic Act 9003 o Ecological Solid Waste Management Act.
Iyang gipasabot nga ang mga barangay kinahanglan adunay aktibong Barangay Solid Waste Management Committee ug functional MRF aron maatiman ang biodegradable ug recyclable waste, samtang ang residual waste lamang ang ihatud ngadto sa sanitary landfill.
Dugang pa niya, ang incentive program gitukod aron dasigon ang mga barangay nga mosunod sa balaod ug maminusan ang basura nga ilabay sa landfill.
Apan, gitataw ni Mabilen nga nalangan ang paghatag sa insentibo human gigamit ang pondo atol sa contingency operation sa garbage collection niadtong 2025 sa dihang mihunong ang contractor sa siyudad.
Hinumdomi nga ang CLENRO naghangyo na og supplemental budget aron mabayaran ang pending incentives sa Barangay Agusan ug Barangay Pagatpat, nga nagpakita og maayong pagdumala sa basura sa ilang lugar.
