CAGAYAN DE ORO CITY-Pagkatangtang sa trabaho ang dangatan sa mga pulis nga mag-positibo sa gihimong surprise drug test atol sa regional anti-illegal drugs summit sa Camp Alagar ning syudad.
Kini human gipaubos sa drugtesting ang dul-ag libo ka police drug enforcement unit personnel.
Gibutyag ni PNP regional spokesperson Supt Surkie Serenias nga gihimo ang surprise drug test sa maong mga pulis aron pagsiguro nga limpyo sila nga mohimo’g anti-illegal drug operations sa rehiyon.
Gikan sa lima ka probinsya sa rehiyon ang maong mga pulis nga gipaubos sa drugtesting sa Camp Alagar ning syudad.
Samtang gipasalig sa PNP Regional Crime Laboratory ang kredibilidad ug integredad sa ilang gihimong drug test sa tanang drug enforcement unit sa rehiyon.
Miingon si PNP-Crime Lab head Supt Mary Leocy Mag-abo nga gilayong ilugwa nila ang resulta sa drug test examination sa dul-ag libo ka pulis sa rehiyon ning semana.
Gibutyag ni Mag-abo nga wala sukad nga namansahan ang ilang kredibilidad pag-abot sa resulta sa mga drug test nga gihimo sa opisina niini.
Nangandam na usab sila sa posibleng resistance sa pipila ka pulis nga makit-ang positibo sa drugtest sa dul-ag libo ka pulis sa Camp Alagar ning syudad.
