CAGAYAN DE ORO CITY – Gipatuman karon kapolisan,militar ug ubang support groups ang pinakahugot nga seguridad sa Higalaay Civic Military and Floats Parade sa syudad ning adlawa.
Kini pagsiguro nga dili mabutang sa peligro ang seguridad sa govt officials,mga bisita ug katawhan nga mosaksi sa parada nga sugdan sa Rodelsa Circle padulong sa Limketkai area karong buntag.
Nanghinaut si City Police Director Col. Henry Dampal nga mosunod ang katawhan sa ilang hangyo diin tumong ug tinguha lamang ang kaayohan sa tanan.
Gipanawagan usab ni Dampal sa tanan nga maglikay sa pagsul-ob sa mga mahalon nga alahas aron malikay nga mabiktima sa mga dautang elemento ug ingon man ang pagdala sa mga backpacks, kalo ug sun glasses.
Samtang gipahimangnuan sa Road and Traffic Administration o RTA ang mga motorista nga walay kabag-uhan ang traffic plan nga ilang ipatuman itandi sa miaging tuig atol sa himoong Higalaay Street Parade and Floats karong adlawa.
Miingon si RTA operations officer Dennis Naive nga maoy mabag-o sa aktibidadis ang gindugayon sa parada nga posibleng molungtad sa tunga’g adlaw tungod sa kadaghang contingents nga moapil.
Si Naive miingon nga maoy ruta sa parada gikan Velez-Fernandez St, moliko sa C.M Recto padulong sa Limketkai area.
Una nang gibutyag ni City Tourism Officer head Chyza Dolguyme nga nadugangan sa 26 ka contingents ang miapil sa parada diin gikan sa 112 ka contingents sa miaging tuig, nahimo na kining 138 contingents.
