CAGAYAN DE ORO CITY- Pugsanong gipapauli ang anaa sa kapi’g 600 ka tinun-ang elementarya ug 33 ka magtutudlo gikan sa 6 ka tunghaan nga nakabase sa 3 ka lungsod sa Misamis Oriental kagahapong adlawa.
Kini ang gikompirmar ni Misamis Oriental Gov Bambi Emano tungod sa magpila ka adlaw nang engkuwentro tali sa kasundaluhan ug rebeldeng New People’s Army sa mga utlanang bahin sa lungsod sa Sugbungcogon,Binuangan,Salay ug Kinoguitan ning lalawigan.
Gibutyag ni Emano nga nag-resulta sa negatibo nga imahen alang sa lalawigan ang engkuwentro diin may usa ka sundalo na ang namatay.
Giawhag ni Emano ang duha ka panig nga i-undang ang engkuwentro ug mobalik sa negosasyon sa hisgutanan sa kahusay’g kalinaw.
Gikompirmar ni Kinoguitan Mayor Junjun Lagbas nga mga tinun-an usab gikan sa pipila ka tunghaang elementarya ang nahikling ug gipapauli ngadto sa ilang mga pamilya sa mismo nila nga lungsod kagahapong adlawa.
Kini human nabati sa katawhan ang pagbinayluay sa mga bala sa armas gikan sa militar ug rebeldeng NPA ilabina sa kabarangayan sa Suarez,Kagumahan ug Kalitian.
Mismo usab ang katawhan ang mibati’g kalisang tungod sa dagkong buto sa kanyon nga gigamit sa mga sundalo punting sa lokasyon sa mga rebelde.
