CAGAYAN DE ORO CITY – Misaka pa sa Php 900-million sa peke nga mga sigarilyo ang nasanta sa hiniusang puwersiya sa National Bureau of Investigation – 10 ug BIR sa gilusad nga pagronda sa duha ka mga bodega dinhi sa syudad kaganina sa udto.
Namahayag si Atty Jonaida Darimbang, legal counsel sa BIR nga napamatud-an sa ilang mga operatiba nga peke ang packaging ug migamit sa fake stamps ang mga sigarilyo sama sa YS Filter, Jackpot kolor green ug asul, Bravo Cigarrettes kolor pula, Marvels, ug ang brand nga TWO MOON.
Nakuha ang mga peke nga sigarilyo sulod sa bodega nga gipanag-iyahan sa dako nga patigayon ning syudad ug girentahan sa JKS Marketing diin nakuhaan sa daghang mga peke nga sigarilyo.
Giklaro sa nanag-iya sa maong warehouse nga wala sila’y kalabutan sa maong mga kontrabando nga nakuha sa NBI ug BIR nga pagpangronda kay gikan man kini sa ilang tenant.
