CAGAYAN DE ORO CITY – Gibasura’g hurot ni City Prosecutor Atty.Clarisse Galarrita Bitoon ang dul-an napulo ka kasong administratibo batok kang Lapasan Punong Brgy Julieto Ogsimer ug laing mga kauban sa ilang barangay ning syudad.
Kini human walay nakita nga lig-ong ebedensiya ang investigating prosecutor nga gitahasan ni Bitoon pagsuta kon may basehan ang mga pasangil sa kanhi empleyado sa brgy nga si Chuchi Evalle Acaso sa piskalya sa dakbayan.
Namahayag si Ogsimer nga nagpamatood lamang kini nga pulos bakak ang gipasiatab nga impormasyon ug pasangil ni Acaso batok kaniya.
Una nang miakusar ang complainant nga nangutang sa sobra 2 milyones pesos si Ogsimer sa pamilya ni Kapitana Gigi Go kay gamiton sa mga kalihukan sa pagpadagan sa brgy sa tuig 2021.
Apil sa gibasura sa prosekusyon ang kasong pagsupak sa Republic Act 3019 (Anti-Graft and Corrupt Practices Act);Republic Act 7160 ( Local Government Code of 1991);Republic Act 6713 (Code of Conduct and Ethical Standards) ingon man dishonesty;grave misconduct;abuse of authority ug conduct unbecoming of a public officer.
Hisayrang unang nagpatawag sa prensa ang panig ni Acaso kay aron ipahibalo ang giingong mga kaso nga giakusar batok kampo ni Ogsimer nga nakasang-at sa Office of the Ombudsman,city council sa syudad ug sa city prosecutor’s office.
