CAGAYAN DE ORO CITY – Nagpaubos sa proseso sa Enhanced Comprehensive Local Integration Program o E-CLIP ang dul-an 20 ka sakop sa CPP-NPA nga gilangkuban sa upat ka full-time members ug 14 ka supporters sulod sza 48th Infantry Batallion headquarters sa Purok 10,South Población, Maramag,Bukidnon.
Kini epekto sa nakab-ot nga hukom sa maong mga rebelde nga isalikway na sa hingpit ang armadong kalihukan kay nagkawala na’y klaro ang direksyon sukad nga nangawala na ang tag-as nga lideres sa ilang central committee kay nangamatay tungod sa sakit samtang ang uban napatay sa mga engkuwentro ug nangadakpan.
Napasayon ang balik-gobierno sa maong mga rebelde tungod sa paningkamot sa 48th IB inabagan sa Bukidnon 2nd Provincial Mobile Force Company ug local government unit sa lugar.
Namahayag si Police Regional Office 10 Director Brig Gen Jaysen De Guzman ug 4ID commanding officer Major General Jose Maria Cuerpo II nga daghan positibong resulta sa maong paningkamot kon adunay hiniusa nga lakang alang sa pagkab-ot sa kahusay’g kalinaw sa usa ka lugar.
Sa pagsalikway sa maong mga rebelde sa kalihukan, gidala nila ang tulo ka assault rifles;kalibre 45 ug mga dokumento nga dunay dakong kalabutan sa armadong pakigbisog.
