CAGAYAN DE ORO CITY – Nakadakop sa laing higayon ang mga pulis sa balor 760-mil pesos nga inismagol nga sigarilyo sa Purok 1,Brgy Bansarvil 1,Kapatagan,Lanao del Norte.
Saysay ni Police Regional Office 10 Director Brig Gen Jaysen De Guzman nga maoy nakasitar sa maong kontrabando ang 2nd Provincial Mobile Force Company sa Lanao del Norte Police Provincial Office nga gikarga sa sport utility vehicle nga unang milikay sa road checkpoint.
Siya miingon nga dihang nabantayan sa tropa nga kadudahan na ang lihok sa nagsakay sa sakyanan,gilayon na nila giharang apan wala mohunong ug natigayon ang pagginukdanay.
Miingon ang heneral nga dihang nalukong na ang sakyanan,wala na usab ang nagmaneho ug ang kotrabando na lang ang nabilin sa Purok 4 sa maong lugar.
Nasuta nga dul-an 20 ka kahon sa mga klase-klaseng sigarilyo ang nakompiskar ug gitugyan na sa Bureau of Customs Iligan City District Office alang sa dugang mga lakang.
