CAGAYAN DE ORO CITY – Dili ihunong sa Diamond Millennium Corporation o DMC ang ilang mga padula sa small town lottery o STL bisan kon sunod-sunod nga gipangdakop sa mga pulis ang ilang civilian tellers sa syudad ug lalawigan.
Kini human unang gipamugos sa Philippine Charity Sweepstakes Office o PCSO nga walay permit to operation ang DMC ug nahatag na ngadto sa laing operator nga mao ang Hexaprime.
Miingon si Atty Dale Mordeno,legal chief sa DMC nga kon ihunong nila ang STL operations,susama ra nga ensakto ang mga pagpangdakop sa mga pulis.
Samtang dili angayang basulon ug sang-atan sa kasong kriminal ingon man administratibo ang mga pulis nga midakop sa halos 20 ka tellers sa small town lottery outlets o STLs nga ubos sa pagdumala sa DMC sa syudad ug lalawigan.
Kini ang tubag ni Police Regional Office 10 Director Brig Gen Ricardo Layug Jr sa pasiatab sa legal team sa DMC.
Miingon si Layug nga angayang maghupot sa bag-ong permit to operate ang DMC aron walay dakop nga mahitabo sa mga gipadagan nga STL outlets niini.
Namugos ang heneral nga dunay permit to operate gikan sa PCSO ang Hexaprime rason nga ensakto lamang nga rondahon sa iyang mga pulis ang STL outlets sa DMC.
Una nang naglugwa ang korte suprema sa status quo ante order pabor sa DMC operation sukwahi sa gustong ipamugos sa PCSO nga nagtugot sa Hexaprime.
