CAGAYAN DE ORO CITY – Mihangyo si Tablon Punong Brgy Billy Kid Auza sa mga grupo nga dunay ikatabang nga sila maabagan sa panginahanglan sa ilang katawhan nga biktima sa laing dakong sunog kagahapong adlawa.
Kini human apektado ang dul-an 30 ka pamilya o sobra 130 ka tawo sa pagkasunog sa ilang mga balay nga unang nagsumikad sa balay ni Alma Remeliete sa Riverside,Purok 5 sa maong lugar.
Miingon si Auza nga mohimo sila’g special session sa konseho aron mapasar ang resolusyon nga magpalugwa sa disaster quick response fund nga magamit alang sa pasiunang tabang sa mga apektadong residente.
Mitala sa sobra 2 milyones pesos ang pagkasunog sa 20 ka balay nga naglakip sa personal nga kabtangan sa mga biktima.
Samtang wala pa’g gihatag nga rason ang Bureau of Fire Protection o BFP kon nganong kalit ang pag-ulbo sa kalayo sa balay sa pamilyang Remeliete sa Riverside,Purok 5,Brgy Tablon sa syudad.
Miingon si BFP Tablon Sub- Fire Station commander SFO2 Flaviano Ente nga padayon pa ang gihimo nila nga pakisusi kabahin sa maong trahedya.
Gikompirmar ni Ente nga walay kinabuhi nga nakalas apan samaron ang kapikas ni Alma Remeliete diin didto nagsumikad ang pag-ulbo sa kalayo.
