Dul-an Half Milyon kantidad shabu nasanta sa 3 pusher sa Tablon, CDO sa Huwebes Santo

Tulo ka giingong nalambigit sa ilegal nga droga ang nadakpan sa gihimong buy-bust operation sa Zone 5, Brgy. Tablon, Cagayan de Oro City sa hapon sa Abril 2, 2026.

Giila lamang sa ilang mga alyas nga “Jay-r,” 38, “Christine,” 33, ug “Kenneth,” 28 ang mga suspek nga pulos residente sa maong lugar.

Gisugdan ang operasyon alas 4:23 sa hapon sa mga operatiba sa City Drug Enforcement Unit (CDEU), COCPO uban ang City Mobile Force Company (CMFC) ug PDEA-10.

Nakumpiskar gikan sa mga suspek ang gibanabana nga 63 gramos sa giingong shabu nga adunay Standard Drug Price (SDP) nga ₱428,400.

Lakip sa nakuha ang usa ka sachet nga gigamit isip buy-bust item, tulo ka sachet sa giingong shabu, usa ka ₱500 bill nga gigamit isip marked money, usa ka cellphone, digital weighing scale, ug ubang drug paraphernalia.

Karon, anaa na sa kustodiya sa CDEU-COCPO ang mga suspek alang sa hustong disposisyon ug pagsaka sa kaso.