CAGAYAN DE ORO CITY – Nakaduso na sa iyang kandidatura pagka-mayor si Phividec Administrator Jose Gabriel ‘Pompee’ La Viña aron ikaatbang si incumbent Cagayan de Oro 1st District Rep. Rolando ‘Klarex’ Uy sa syudad sa 2022 elections.
Kini human gisibog ni Lakas CMD party mayoralty candidate Atty Florentino Dumlao subay sa kamanduan sa ilang kadagkuan sa kauluhan.
Mismo si Dumlao ang midalikyat sa buhatan sa Comelec aron iduso kang City Election Officer Atty Ramil Acol ang withdrawal sa kandidatura niini aron maka-substitute si La Viña.
Kuyog ni Dumlao sa pagsibog sa kandidatura ang usa sa mga sinaligan partido nga si Atty Alvin Calingin kinsa magpapili usab pagka-konsehal sa unang distrito ning syudad.
Dugtong niini,gipasalamatan ni Pompee si Dumlao ug ang partido nga siya ang gihatagan sa higayon alang sa substitution ayha ang petsa 15 sa Nobyembre nga gisitar nga tagal sa Comelec.
Miingon si La Viña nga bisan sa iyang pagtabok sa laing partido apan dili suliran ang relasyon niini kang Presidente Rodrigo Duterte kinsa anaa sa PDP-Laban Cusi wing.
Sa wala pa moduso sa substitution si Pompee,nakapanumpa na isip bag-ong miembro sa Lakas-CMD ang iyang ka-alyado nga si Davao City Mayor Inday Sara Duterte- Carpio nga modagan usab pagka-presidente.
Una usab niini,gikuyugan nila ni incumbent Deputy House Speaker CdeO 2nd District Rep Rufus Rodriguez ug 1st district congressional candidate Atty Lordan Suan si La Viña sa CoC substitution.
Dugtong niini,gikonsiderar na nga resigned administrator si Pompee sa Phividec kay nakaduso naman kini sa iyang kandidatura pagka-mayor batok Klarex sa dakbayan sa sunod tuig.
