Taliwala sa mga sunod-sunod nga kontrobersiya ug isyu nga gikalambigitan sa pipila ka sakop sa kapulisan sa rehiyon sa miaging mga semana, nagpasidaan ang Police Regional Office 10 sa mga bag-ong rekrut nga ampingan ang ilang dungog ug responsibilidad.
Gipahayag ni Police Major Joann Navarro, tigpamaba sa PRO-10, nga walay duha-duha nga matangtang sa serbisyo ang kinsa man sa 235 ka bag-ong patrolmen ug patrolwomen nga mohimo og bug-at nga salaod ug kalapasan.
Gipahinumdoman sa buhatan ang mga bag-ong pulis nga hinumduman ug huna-hunaon gayod ang hilabihang kalisod ug sakripisyo nga ilang naagian una sila nakasulod sa buhatan, diin gikan sa dul-an 1,500 nga nag-apply, 235 ra ang napilian.
Busa, gipahinumdoman ang maong mga bag-ong sakop nga moagi pa sa 1 ka tuig nga pagbansay-bansay nga panalipdan ang disiplina sa kapulisan tungod kay kadali ra kaayong maputol ang ilang serbisyo kon ugaling molapas sila sa balaod.
