CAGAYAN DE ORO CITY-Nasikop sa kapolisan ang tulo ka lalaki nga nagpasuyop sa shabu sa ilang mga parokyano sulod sa passenger van nga nagsilbing mobile drug den atbang lamang sa Bombo Radyo sa Corrales Avenue sa syudad kaganihang kadlawon.
Naila ang mga dinakpan nga sila si Ramil Liyago nga taga- Brgy Macasandig sa syudad;Lito Andam ug Clyde Capinpuyan nga pulos nagpuyo sa Camp Philips,Manolo Fortich,Bukidnon.
Namahayag si Agora Police Station deputy commander Sr/Insp Ritchelle Torayno nga nagdumili pag-abli sa sakyanan ang mga suspek hinungdan nga pugsanon nila kining giablihan ug nagresulta sa pinusilay.
Samaron si Capinpuyan sa likod human gilayong nakabalos ang mga nagpalibot nga pulis sa maong mobile drug den.
Nakuha ang kalibre 45 nga armas,duha ka dagkong putos sa shabu ug drug paraphernalia.
Una niini,gihamakak ni Liyago nga namaligya sila’g droga apan igo lamang naggamit sa shabu sulod sa gisakyan nila nga mobile drug den.
