CAGAYAN DE ORO CITY – Gitawag ni CPP founder Jose Maria Sison nga tawo-tawo lamang si Pres Rodrigo Duterte sa iyang gipangsugo sama sa mga sundalo nga ipabungkag ang kalihukang rebolusyonaryo sa nasud.
Miingon si Sison nga unta dili tugtan ni Duterte ang iyang mga sundalo nga mahimong kasangkapan aron dauton ang dugay nang nasugdan nga peace negotiations nga ikaayo sa katawhan.
Namugos si Sison nga dili basta-basta nga mouli sa Pilipinas kon ang tuyo sa mga sundalo ang pagdakop ug pagpatay lamang kaniya.
Samtang gitin-aw ni National Security Adviser Hermogenes Esperon Jr nga ang CPP-NPA-NDFP maoy supak nga maangkon ang kalinaw sa tibook nasud.
Kini ang reaksyon ni Esperon sa pasangil sa rebolusyonaryong grupo nga ang mga sundalo mao ang dakong babag sa pagkab-ot sa kahusay ug kalinaw.
Sa interview sa Bombo Radyo, gibutyag ni Esperon nga kabahin ang CPP-NPA-NDFP nga wala mipirma sa gisugyot niya nga peace negotiations sa grupo sa Moro Islamic Liberation Front o MILF dihang nagsilbi pa siyang Presidential for Peace Adviser.
Apan giangkon ni Esperon nga adunay mga kondisyon sa CPP-NPA-NDFP ang wala nila mauyuni sama na lamang sa hisgutanan sa socio-economic reforms ug daghan pang uban nga pabor sa mga rebeldeng New Peoples Army.
