Nangayo’g pasaylo sa mga naglangkob sa quadrocom si kanhi Pres Rodrigo Duterte sa kalit pag-init sa iyang ulo sa pasangil ni kanhi Senador Antonio Trillanes IV.
Kini human gitugtan sa komitiba si Trillanes maka-presentar sa bank transactions nga walay klaro nga tinubdan diin giakusar nga mga suburno sa suspected druglords sa mga Duterte sa Davao City sa miaging mga katuigan.
Miingon si Duterte nga sayop niya kay nadala kini sa kainit sa iyang ulo sa imbento ni Trillanes nga pasangil batok sa iyang pamilya.
Gisaysay man gud ni Trillanes nga kabahin sa nakadawat sa binilyong druglord money si Vice Pres. Sara Duterte,Davao City 1st District Cong. Paulo Duterte,City Mayor Sebastian Duterte ug ang common-law wife ni Digong.
Gikasuko ni Duterte nga bisan ang iyang mga anak gidamay ni Trillanes sa presentasyon niini.
Una nang gipanguta sa komitiba si Duterte kon andam ba kini mopirma sa bank waiver aron maablihan ang ang mga pondo sa bangko.
Apan mi-kontra pangutana ang kanhi president sa pangutana nga kon mopirma siya’g bank waiver, iyang sagpaon si Trillanes atubangan sa komitiba.
Napugos sa pag-suspenso sa imbestigasyon ang komitiba aron mabugnaw ang tension ni Duterte ug Trillanes.
Si Trillanes ang tinahasan sa oposisyon aron gukdon sa mga isyu ang mga Duterte.
