Pinal na ang desisyon sa depensa nga dili mutambong si kanhi Presidente Rodrigo Duterte sa video conference sa pagkumpirmar sa iyang mga kaso o “confirmation of charges sa Pebrero 23.
Kini ang gibutyag ni Atty. Nicholas Kaufman, lead counsel ni Duterte, didto sa The Hague, Netherlands. Namahayag si Kaufman, nga niadtong Marso 2025, wala usab mitunga sa hearing sa Pre-Trial Chamber I ang pangulo, kay gibalibaran ang ilang hangyo nga i-postpone ang unang pagdungog aron makaatubang siya sa personal ug ma-isa ang isyu sa legal competence sa kanhi Presidente.
Nagdumili na sa pagbutyag si Kaufman kung makigkita ba sa personal sa mga hurado o isalikway ang iyang katungod sa pagtambong.
Hisayran nga subay sa abiso sa International Criminal Court (ICC), ang hearing ipahigayon gikan sa alas 10 sa buntag hangtod sa alas 3 sa hapon, oras sa The Hague kon alas-5 sa hapon hangtod sa alas 10 sa gabii sa Pilipinas, sa Pre-Trial Chamber I. Atol sa pagdungog, ang prosekusyon, depensa, ug mga abogado sa mga biktima hatagan sa gitakdang panahon sa pagpresentar sa ilang mga argumento.
Ang confirmation of chargers maoy mutumbok kung aduna bay igo nga ebidensya aron ipadayon ang kaso sa Trial Chamber.
Kini sundan sa mga pagdungog sa Pebrero 24, 26 ug 27.
