CAGAYAN DE ORO CITY – Gipasalig ni Pres Rodrigo Duterte ang salary increase sa mga magtutudlo sa pampublikong tunghaan sa tibook nasud ning tuiga.
Gihimo sa presidente sa nasud ang kumpirmasyon sa iyang pagtambong sa oathtaking sa mga midaug nga kandidatong lokal sa Xavier Estates, Upper Carmen dinhi sa syudad.
Si Pres Duterte miingon nga dili angayang masuko kaniya ang mga magtutudlo tungod kay wala sila kalimti sa gobyerno.
Gitin-aw niini nga iya lamang gi-una ang usbaw nga suhulan sa mga sundalo ug pulis tungod sa buhis-buhay nila nga trabaho ug dako ang ilang nahimong papel ilabina sa kampaniya sa gobyerno batok sa terorismo ug illegal drugs.
Dugtong niini,nanghinaut ang pipila ka grupo sa mga magtutudlo nga tumanon na gayud sa hingpit sa presidente ang iyang saad nga patas-an ang suhulan sa mga teachers sa nasud.
Kini human subling gisaad ni Pres Rodrigo Duterte nga iyang patas-an ang sweldo sa mga magtutudlo atol sa iyang pagbisita sa syudad kagabii.
Gibutyag ni ACT Teachers region 10 Union Pres Ophelia Tabacon nga gibati na silag kalugda ni Duterte gumikan kay tulo na katuig dihang una silang gisaaran apan hangtud karon pakyas lang gihapon.
