CAGAYAN DE ORO CITY – Gibaharan ni Pres Rodrigo Duterte ang matag-local govt unit officials o mga mayores nga pasilotan sa DILG tungod sa hinay nga vaccination rollout sa mga bakuna alang sa paghatag proteksyon sa katawhan batok COVID-19.
Kini human nabantayan ni Duterte nga paspas ang pag-release sa mga bakuna sa kauluhan apan sobra kahinay pag-abot sa mga probinsya.
Gimando sa presidente kang Philippine Vaccine Czar Sec Carlito Galvez Jr ang direkta na nga pagpahatod sa mga bakuna sa mga syudad ug kalungsuran gamit ang AFP ug PNP choppers aron pagtubag sa kakulangon sa mga bakuna sa kada-probinsya.
Dugtong niini,giangkon sa hugpong sa mga mayores sa Misamis Oriental nga dakong bikil ang limitasyon sa pasilidad nga magamit nga pondohan sa mga suplay sa bakuna alang sa paspas nga vaccination rollout ngadto sa katawhan.
Kini ang tubag ni League of Mayors in the Philippines o LMP-Misamis Oriental chapter president ug Magsaysay Mayor Rey Buhisan kabahin sa tinguha ni Pres Rodrigo Duterte.
Miingon si Buhisan nga wala pa’y labot niini ang pagduha-duha sa katawhan sa mahimo nilang dangatan kon magtupok sa bakuna.
Giklaro sa mayor nga nasabtan nila si Duterte apan angayang ma-balanse usab ang sitwasyon sa mga probinsya aron makab-ot ang kagustuhan sa nasudnong gobierno.
Samtang gitinguha ni City Mayor Oscar Moreno nga mamintinar ang alert level 2 restriction alang sa pakigbatok sa padayong impeksyon sa COVID-19 ning syudad.
Kini aron mas mahimo pa sa dakbayan ang paspas nga pagpamakuna bisan nga nagpa-apiki nga makab-ot ang ‘herd immunity’ sulod ning bahina sa tuiga.
Miingon si Moreno nga dili ikalalis nga dako’g tabang aron kunhuran ang mga positibong kaso pinaagi sa vaccination rollout hinungdang giaghat ang katawhan nga kini pahimudsan.
Hinoon,mismo ang DoH ang nakakita sa epesyente nga vaccination rollout dinhi sa syudad itandi sa ubang mga lugar dinhi sa rehiyon.
