CAGAYAN DE ORO CITY-Walay grado nga nahatag ang mga progresibong pundok sa trabaho ni Pres Rodrigo Duterte nga iyang nabatbat sa ika-upat nga SONA sa Batasang Pambansa sa kauluhan.
Kini human dismayado ang maong mga grupo sa giingong pakyas ug walay nahimo nga mga saad ni Duterte sa katawhan sa nasud.
Miingon si Fr Jhong Abejo sa grupong Movement Against Tyranny Northern Mindanao nga pulos pagpaulipon lamang sa Amerika ug China ang nahimo ni Duterte diin nalimtan kon unsa ang tinud-anay nga pagtubag sa yangu-ngo sa katawhang kabus sa kabanikanhan.
Gusto usab sa grupo nga malagpot sa puwesto si Duterte kinsa nagpatuman sa martial law sa Mindanao.Samtang wala magpapugong ang pipila ka magtutudlo sa paghimog rally dungan sa SONA ni Pres Rodrigo Duterte kagahapong adlawa. Kini bisan nga may mga tawong naglaraw pugngan ang ilang kalihukan. Miingon si Alliance of Concerned Teachers region 10 Pres Ophelia Tabacon nga gamay lamang ang nakatambong sa ilang gihimong rally sa syudad tungod kay gipugngan sa mga checkpoint sa militar ang ilang mga kauban.
Bisan niini,nagmalampuson daw gihapon ang ilang gihimong pag paabot sa mensahe ngadto sa gobyerno.Samtang gipasabot ni Police Regional Office o PRO 10 spokesperson Police Lt. Col. Mardy Hortillosa nga ang ilang gihimong pag checkpoint dili aron pagpugong sa mga tawong mihimog protesta.
Miingon si Hortillosa nga ila lamang gihunahuna nga dili mabutang sa alaot ang kahimtang sa mga bata nga ipaapil sa rally.
Maoy rason nga nakig-koordinar sila sa mga personahe sa DSWD aron sa paghold sa mga bata nga ubanon sa rally sa mga progresibong pundok.
Hisayran nga sagad gakaobserbahan ang presensya sa mga bata panahon nga adunay rally nga gihimo sa syudad.
