CAGAYAN DE ORO CITY – Tuyo ni Deputy House Speaker Cong Rufus Rodriguez sa segundo distrito ning syudad nga e-suspenso una ni Pres Rodrigo Duterte ang pagpatuman sa 12 porsiento nga excise tax sa mga produktong petrolyo sa nasud.
Kini ang rason nga mipasar siya sa balaodnon aron aghaton si Duterte nga dunay special session ang Kongreso alang niini.
Katuyuan niini nga kibhangan ang sobra na kataas sa presyo sa produktong petrolyo nga gipasamutan sa krisis sa Uropa diin maglima ka adlaw nang naggubat ang puwersa sa Rusya ug Ukraine.
Sa ikalipay sa grupong National Confederation of Transport Union Northern Mindanao kon mosanong si Pres Rodrigo Duterte ug mosanong sa hangyo sa pipila ka magbabalaod nga ihunong una ang dugang buhis sa oil products dinhi sa nasud.
Kini ang reaksyon ni NCTU coordinator Joel Gabatan apan mas gustuhon usab nila nga wad-on sa hingpit ang oil deregulation law nga disbentahan kaayo sa katawhan.
Una usab niini,masaligon ang grupo nga tinud-anay makaabot sa public utility vehicle drivers ang laing 2.5 bilyon pesos nga fuel subsidy nga gigahin sa gobierno alang sa transport sector.
Samtang bisan ang hugpong sa mga negosyante ang nalabaka usab sa epekto sa kagubot nga gipasiugdahan sa Rusya batok Ukraine didto sa Uropa.
Gibutyag ni Antonio Uy,presidente sa Misamis Oriental Filipino-Chinese Chamber of Commerce nga unta may dinaliang konkreto nga mga lakang ang gobierno aron ubsan ang epketo nga mahatag alang sa ilang sektor ug ilabina sa katawhan.
Uyon usab kini sa gihimong lakang sa international community nga gipahamtang sa economic sanctions ang Rusya.
