CAGAYAN DE ORO CITY-Giduaw ni Pres Rodrigo Duterte ang dul-ag 60 ka samarong pulis ug sundalo ingon man ang dugang siyam ka patay’ng lawas sa tropa sa gobierno sa Iligan City kagahapong adlawa.
Kini aron ipaabot ni Pres Duterte ang pakigduyog sa iyang mga sundalo ug kapolisan nga nakig-engkuwentro batok sa teroristang Maute sa Marawi City,Lanao del Sur sukad niadtong Martes.
Matud ni Iligan City Information Officer Joe Pantoja nga gihatagan ni Duterte sa personal cash assistance ug kaugalingong mga armas ang mga samarong sundalo ug pulis atol sa iyang pagbisita.
Gani,gimando usab ni Duterte kang City Mayor Celso Regencia nga ipaatiman ang libuang bakwit nga nahiluna sa Brgy Buru-un,Brgy Maria Cristina ug MSU-IIT sa Iligan City.
