CAGAYAN DE ORO CITY-Gipasalamatan sa mga pamilya sa mga sundalo nga napatay sa engkuwentro batok mga rebelde si Pres Rodrigo Duterte nga miduaw sa Saint Ignatius de Loyola Parish diha sa Brgy Patag sa syudad kagahapong adlawa.
Gibutyag ni Lourdes Rosala kinsa inahan sa napatay nga si PFC Oshen Rosala nga natandog ang ilang pagbati tungod kay gihatagan sila sa pagtagad ni Pres Duterte bisan nga sila ordinaryong mga tawo lamang.
Gibutyag ni Rosala nga kuyog ang pamilya sa laing napatay nga si Cpl Marzon Morales,gihatagan sila sa cash assistance ug tseke ni Pres Duterte.
Una na usab nga gihatagan sila si Rosala ug Morales sa Military Merit Medal with Spearhead Device Posthumous Award ug wounded personnel medal awards ang laing 7 ka samaron.
Samtang giipangayo karon sa kabanay sa mga sundalo nga napatay atol sa engkuwentro sa rebeldeng NPA kang Pres Rodrigo Duterte nga dili pasagdan ang pagpatungha sa mga anak niini.
Kini maoy bugtong hangyo ni Aiza Morales kinsa kapikas ni Morales nga kabahin sa nakalas sa maong engkuwentro.
Gihimo ni Morales ang hangyo atol sa pagbisita ni Pres Duterte sa mga haya niini diha sa Saint Ignatius de Loyola Parish sulod sa Camp Evangelista ning syudad.
Gibutyag ni Gng Morales nga sakit alang sa ilang pamilya ang kalit pagkawala sa iyang bana.
Kabahin usab sa giduaw ni Duterte ang haya ni Rasala nga unang nakalas atol sa pakig-engkuwentro sa mga rebelde sa Sugbongcogon,Misamis Oriental niadtong adlaw’ng Lunes.
