CAGAYAN DE ORO CITY-Pabiling pokus si President Rodrigo Duterte sa iyang pakig-giyera batok mga grupo nga utok sa pagpalusot sa gidiling droga sa nasud.
Kini bisan nga ubay-ubay sa iyang mga pulis ang nangamatay ug nakasuhan gumikan sa pagpatuman sa anti-illegal drugs war kontra mga sindikato.
Gihimo ni Special Asst to the President o SAP Christopher ‘Bong’ Go ang pahayag nunot sa kasuko ni Duterte sa kamatayon sa unom ka PDEA agents nga gi-ambush sa 10 ka armadong tawo sa politiko sa lungsod sa Kapai,Lanao del Sur sa miaging semana.
Si Duterte ang nagmando sa PNP ug PDEA nga dakpon nga buhi o patay ang mga suspek nga gikasuhan na sa piskalya gumikan sa maong salaod.
