CAGAYAN DE ORO CITY-Hatagan ni Pres Rodrigo Duterte sa premyo nga singko milyon pesos ang mga tawo nga makatabang sa kapolisan ug militar nga ikasikop sa wanted nga si Misamis Occidental board member Ricardo ‘Ardot’ Parojinog.
Kini human kumbinsido si Duterte sa kalambigitan ni Parojinog sa pagpayuhot sa gidiling droga ug pagbaton sa criminal syndicate groups nga suspek sa mga dagkong pagpanulis sa nagkadaiyang bahin sa nasud.
Si Ardot ang igsoon ni late City Mayor Reynaldo Parojinog Sr atol sa dugu-ong police anti-illegal drugs operation sa Ozamiz City sa miaging Hulyo 30 ning tuiga.
Samtang gitahasan ni PNP regional director C/Supt Timoteo Pacleb ang intelligence community sa pagtumbok sa mga tawo nga naghatag protection sa nagtagu-tago nga si Parojinog.
Kini sukad nga gilusob sa PNP composite team ang mga pinuy-anan sa mga Parojinog diin si Ardot lamang ang wala makuha kay posibleng nakabantay sa operasyon sa Ozamiz City.
Gibutyag ni PNP regional spokesperson Supt Lemuel Gonda nga mismo na ang intelligence units sa nagkadaiyang ahensiya ang mi-trabaho sa mando ni Duterte aron masikop si Parojinog nga giila nga labing bangis sa Ozamiz City.
