CAGAYAN DE ORO CITY-Nahatagan sa gamay’ng paglaum ang grupo sa Mindanao Pride LGBT sa baruganan ni Pres Rodrigo Duterte kabahin sa isyu sa same same marriage sa nasud.
Kini human unang giklaro ni Pres Duterte nga uyon siya nga ipatuman ang seremonya sa kaminyoon tali sa managsama nga lalaki ug babaye.
Gibutyag ni Mindanao Pride LGBT board member Ryan Doll nga nalipay sila nga nagsugdan na ang pagtuki sa maong isyu.
Apan pagsupak sa pagtulun-ang Kristiyano ang pagpakasal sa isig-ka-ingon.
Kini ang gibutyag ni Msgr Perceus Cabunoc,rector sa San Agustin Cathedral mahitungod sa subling pagtumaw sa isyu sa “same sex marriage bill” nga posibleng uyunan ni Pres Rodrigo Duterte.
Gibutyag Cabunoc nga usa siya sa mag-una sa pagsupak sa maong sugyot tungod kay makapatay sa usa ka komonidad ang maong matang sa panag-uban.
Namugos si Cabunoc nga dili makita sa bibliya nga gitugutan ang pagminyo sa lalaki sa lalaki ug managsamang babaye.
Samtang supak si Citizens Watch for Good Governance o CWGG convenor Atty Antonio Soriano sa hisgutanang “same sex marriage”.
Namugos si Soriano nga dili angayan gamiton ang pulong “marriage” o kasal sa pag-uban sa duha ka isigka-ingon.
Hinoon,nagtoo si Soriano nga daghan pang legal remedies ang maong sugyot aron mahatagan sa igong pagrespetar ang anaa sa LGBT community nga buot magminyo.
Misugyot si Soriano nga inay “kasal” mas haum gamiton ang pulong “partnership” isip “binding” nga kontrata sa duha ka isigka-ingon nga gustong himoong legal ang ilang panag-uban.
