CAGAYAN DE ORO CITY – Miani sa nagkadaiyang reaksyon ang laing political statement ni kanhi Pres Rodrigo Duterte diin nagtinguha nga gusto niini mobulag na ang Mindanao gikan sa nasudnong kagamhanan sa nasud.
Miingon si Citizens Watch for Good Governance 10 convenor Atty. Antonio Soriano nga dili angay nga mobulag sa Mindanao kay pabiling usa lang ang nasud sa Pilipinas.
Reakyon kini ni Soriano sa gipalanog ni Duterte nga kagustuhan mobiya ang Mindanao kay kanunay lang dehado ang kalambuan sa katawhan itandi sa taga-Luzon ug kauluhan.
Samtang dili maayo nga patughan ang kagustuhan ni kanhi Pres Rodrigo Duterte nga ipalayo ang Mindanao gikan sa kontrol sa nasudnong gobierno.
Kini usab ang gipabati nga reaksyon ni Xavier University law professor ug kanhi City Mayor Oscar Moreno nunot sa sugyot nga Mindanao Republic.
Miingon ang kanhi mayor nga mo-resulta lang sa usa ka ‘failed state’ sama sa pipila ka African countries ang Pilipinas kon dili madali ang pagpugong niini.
Samtang dili uyon ug wala pa usa’y pagsupak apan misugyot si Cagayan de Oro 2nd District Cong. Rufus Rodriguez nga ipaubos sa subsob nga pagtoon ang laraw nga pagdistansya sa Mindanao gikan sa nat’l govt.
Namahayag si Rodriguez nga dili angay dali-dalion ang maong katuyuan kay taas pa ang himoong proseso alang niini.
Siya miingon nga daghan ang angay ikonsidera niini ilabina ang isyu sa legalidad kon tinud-anay nga kini ang kagustuhang mahitabo ni kanhi Pres Rodrigo Duterte sa Mindanao.
Sa pikas bahin,suportado sa Mindanaoan congressman ang pagtuon nga mubiya na ang isla sa Mindanao sa nasudnong kagamhanan sa Pilipinas. Kumpirmasyon kini ni Surigao del Norte 2nd district Rep Ace Barbers.
Namahayag si Barbers nga dugay nang isyu nga halos nabiyaan sa kalambuan ang Mindanao kay napukos lang sa Greater Manila Area o sa Luzon kasagaran programa sa national government.
Giawhag ni Barbers ang publiko nga tahuron ang adbokasiya sa mga nagpaluyo sa Mindanao Republic ug tun-aw kini sa kamarabaha.
Alang kang Barbers, panahon na aron sil-ipon sa mga magbabalaod ang benepisyo nga madawat sa mga taga Mindanao kung kini magkinaugalingon isip usa ka republika.
Samtang daw allergic ng mga batan-ong Muslim sa isyu nga magkinaugalingon ang Mindanao.Pamugos kini ni kanhi senatorial candidate Samira Gutoc dihang gideklarar ni Kanhi Pres Rodrigo Duterte nga gusto nilang mubiya sa gobyerno sa Pilipinas ug mubarog isip Mindanao Repbublic.
Miingon si Gutoc kinsa kanhi miyembro sa ARMM Regional Legislative Assembly nga natapos na ang parti sa ilang kinabuhi nga nakigbisog alang sa kagawasan sa Bangsamoro Autonomous Region in Muslim Mindanao.
Gibutyag niini dili na gusto sa ilang katawhan nga mubalik sa sinugdanan ug pakigbisugan ang laing kagawasan tungod kay naplastar na sa nasudnong kagamhanan ang BARMM.
