CAGAYAN DE ORO CITY – Gikalipay sa pipila ka peace talks observers nga giabliha’g balik ni Pres Rodrigo Duterte ang ganghaan alang sa pakig-dayalogo sa CPP-NPA-NDF.
Kini aron hatagan sa katapusang higayon si CPP founder chairman Jose Maria Sison nga sulbaron ang kapi’g 50 ka tuig nang insurhensiya sa nasud.
Miingon si Iglesia Filipina Independiente Bishop Felixberto Calang nga unta wala na’y babag ug mohikling una ang militar sa negosasyon aron mas mopaspas ang pagtubag sa mga demanda sa tali sa duha ka panig.
Samtang dili suliran kon asa nga lugar himoon ang peacetalks tali gobierno ug CPP-NPA-NDF.
Gibutyag ni Citizens Watch for Good Governance o CWGG convenor Atty Antonio Soriano nga maoy importante nga sensiro ang duha ka panig sa pagsulbad sa halos moabot na’g usa ka siglo nga pakigbisog sa mga komunista batok sa kagamhanan.
Nalipay usab si Soriano sa subli pagpakita’g interes ni Pres Rodrigo Duterte sa peacetalks aron mahataga’g sulbad ang pagpinatyanay sa state forces batok NPA rebels.
